استحيت من ربي قصة فتاة

من طرف **همس الوفاء** الثلاثاء يناير 11, 2011 7:52 pm

استحيت من ربي ....... قصة فتاة

نعم استحيت ..استحيت من ربي ..مو لذنب أو معصية ..بس استحيت أرد عطية أنا طلبتها ..عطية أنا أصريت عليها ..عطية اجتهدت كثييييييير لأجل أنولها ..

يمكن بعضكم صار عارف قصتي بشكل عام ..ويمكن البعض أول مرة يقرا لي موضوع ..واللي عارفيني ..مايعرفون سوى اني تملكت ..وبعد فترة وجيييييييييييزة أنفصلت ..

بعيد عن كل تفاصيل القصة اللي الكلام فيها مايودي ولا يجيب ..
مثل ماانتوا عارفين ..انا كنت مثلي مثل غيري( ولازلت ) أتمنى الزوج الصالح ..العمر يمشي ..واللي في عمري تزوجوا وعندهم عيال ..وصار لازم أتزوج ويكون عندي اسرة وبيت ..

حسيت بنقص وأنا أشوف بنات العيلة يتزوجون وأنا لا ..

ولما حسيت أن أمور زواجي قاعدة تتعسر ..طلبت ربي ..ربي اللي مايخيب من طلبه ..دعيته سبحانه واجتهدت في دعاؤي ..قمت الليل أدعي ربي ..وأتوسل وأتذلل ..مابخلت على نفسي بالدعاء ..ثم كااااااااااااان ربي أكرم مني ..

عطاني سبحانه الشي اللي تمنيته ..

بعد تعسر أمر خاطبين في اقل من شهر جاء الثالث ...سألنا عنه ..الكل مدحه رغم انه ماعنده شهاده ..أو على الاقل شهادته أقل من شهادتي ..لكني مانظرت لها الزاويه أبد ..
مافيه من المميزات الشي الكثير ..
بس ..كان يكفيني ..انه يصلي (عكس أكثر اللي يتقدمون لي) ..ومايدخن ..وطيب مثل ماقالوا عنه ..
اعترف ..اني ماعطيت الاستخارة حقها ..هم مرتين الي استخرت فيهم ..وكان في داخلي امنية ورغبة في ان الموضوع يتم ..
وصار اللي كنت ابيه ..
تملكت ..أذكر اني في يوم الملكة بكيت ..خفت ..ليش ماكنت ادري ..كنت حاسة ان في شي غريب قاعد يصير ..بس والله ماكنت عارفة شنو هالشي ..
في يوم الملكه فرحت وتهللت ..بعد ماجتمعوا حولي هلي يباركون ..وبعد ماوقف جنبي ..اللي ظنيت انه راح يكون رفيق عمري وأبو عيالي ..سمعت صوته ..وهمت في صوته ..حبيت صوته كثيييييييير ..
عباراته يومها ..مازلت أذكرها ..
مثلي ..مثل أي بنت شريفة عفيفة عمرها ماكلمت رجال غريب عليها ..فرحت بأني واقفه جنب اللي صار زوجي بالحلاااااااااااال ..فرحته ..وفرحة أمه ..وفرحتي وفرحة هلي ..كل هالتفاصيل والنظرات اللي كانت بعيون الناس من حولي مازلت أذكرها ..
وأذكر اني ..رجعت داري ..وقفت جنب المنظرة ..مثل اللي مو مصدقه ..وحمدت ربي ..
وسجدت لله سبحاااااااااانه سجود الشكر على عطيته لي ..واستجابته لدعاؤي ..

ونمت يوها وانا حاسه اني اسعد انسانه على هذي الارض ..
ومرت الأيام من بعدها ..وكنت أسعد ماأكون ..فرحانه مستبشره ..حبيت ..اي نعم حبيت ..واللي حبيته أكثر ..ان حبي كان ولله الحمد بالحلال ..

فرحت وبديت أجهز ..وشريت حتى فستنان العرس ( اللي عيا ينباع ليومي هذا ..واللي أطمع اني ألبسه عروس )
وفجأة وبدون سبب واضح ..حسيت بضيق ...وعشان اكون صريحة أكثر ..كان في سبب ..بس امتنع عن ذكره ...
باختصار ..لما كنت اجلس معاه ..كنت أحس ..ان مو هذا ..أبد مو هذا اللي كنت أبيه ..طغى علي الاحساس بشكل كبير جدااااااا ..
لدرجة اني لحظة ..فكرت انهي الموضوع ..
بس ..
كيف أنهي الموضوع ..وفرحته ..وفرحة امه وفرحتي وفرحة أمي ..وين أوديهم وشسوي بهم ..
وفووووووووق هذا كله ..
ربي ..استحيت والله من ربي ..حطيت راسي بالأرض .. والله اني لمت نفسي ..تهاوشت مع ( اعذروها ) وبصوت عالي صحت فيها : اني ماتستحين ؟؟ انتي على ايش شايفة نفسج ..طلبتي ربج ..ودعيتيه ولما عطاج ..
تتمردين وتتكبرين ..

والله ..ثم والله ..اني من ربي استحيت ..خفت أظلم ..خفت أجحد ..ومع اني ماكنت مرتاحة ..بس قلت لنفسي قبل ماتقولها امي لي ..لما حست اني مو مرتاحة : بتاخذينه ..غصبن عنج ..

وحاولت اهمش التفكير بعدم الراحة ..ولأن الاحساس بعدم الراحة ماكنت أحس فيه إلا لما كان يزورني ..فكنت في أغلب وقتي فرحانه وسعيدة بمكالماته ..لا وكنت انتظرها على احر من الجمر ..صار صوته بالنسب لي ..مثل الهوا اللي اتنفسه ..
بس ..لما كان يجيني ..ماكنت أتقبله ..كنت أحس ..اني أبي الأرض تنشق وتبلعني ..بس ماأقعد معاه ..دقيقة وحدة

وقاومت احساسي هذا ..كنت ناويه أظلم نفسي ..بس كنت خايفة أكسر فرحة انسان حسيت أنه حبني
كنت خايفة من ردة فعل امي وهلي ..كنت خايفة من كلام الناس ..
وفجأة ..جات من عند ربي ..

سبحانك ..استحيت منك ..وخفت أرد عطيتك ..لكنك يالله ..بعلمك وحكمتك ورحمتك ..دبرتها لي من عندك ..
جات منه ..اي نعم جات منه ..شلون ؟وليش ؟ مالي أي رغبه إني أشرح أو أفصل ..كل اللي أقدر اقوله ..ان هو افتعل المشاكل ..
ولو وحدة ثانيه غيري ..كانت قالت خلاص ..جات من الله ..أحسن ..
لكن انا لا ..ماقدرت أقولها ..يشهد الله ..إني ذليت نفسي ذل ..وسعيت قد ماأقدر أن مايتم الطلاق ..
دست على كرامتي وعلى كرامة هلي ..
وقلت لا ..ماأبي انفصل ..
فكرت في الموضوع من كل النواحي ..نظرة الناس لي ..وبصير مطلقة ..ومحد راح يخطبني ..
امي اللي شفت الفرحة بعيونها وهي تشوفني أجرب فستان عرسي ..
رغبتي بالزواج ...دعاؤي ..
دعاااااااااااؤي...واستجابة ربي لهالدعاء ..
وفوق كل هذا ..حياي من ربي ..وخوفي من انه ماراح يوفقني ..
تنازلت وتناااااااااازلت ..وحسيت انه يمكن يكون اختبار من ربي .صبرت وصبرت ..ليما صارت أحداث والله لو اكتبها لكم ..لكنتوا دعيتو على اللي كان السبب ..لكني مو محتاجة للي يدعي على غيري ..انا محتاجة للي يدعي لي ..وقدرت ..اني اوفي بكلمتي وما أخلي الكلمة تطلع مني ..طلبت الطلاق بمسج ..ثم تراجعت بمسج ..
ثم مرت الايام ..وطلب هو الانفصال ..
اذكر اني دخلت داري ..وضربت ايدي بخزانة الملابس ..كأني انتقم من نفسي ..
ثم ..حمدت ربي واسترجعت ..قلت بصوت عالي ..قدر الله وماشاء فعل ..قدر الله وماشاء فعل ..
وبعد كل هالاحداث ..تذكرت ان ربي الكريم اللي كنت بلحظة مستحية من اني ارفع راسي خوف من اني اكون جاحده ..قدر لي بعظيم فضله ..وقدرته ورحمته ..ورحمني وخلصني ..من الإنسان اللي ماكان لي ولا كنت له ..
يارب ..فكما أكرمتني واستجبت دعاؤي أول مرة ..فإنك قااااااااااااااادر على ان تستجيب لي هذي المرة وتعوضني بمن هو خير منه ألف مررررررررررة ..
يالله جُد علي بعظيم فضلك ورحمتك ..وكرمك وأعطني من هو كفؤ لي وأنا كفؤ له ..بمن ارتاح له ويرتاح لي ..بمن يكون أبا لذرية لي منه ..ذرية من حفظة كتابك يالله ..
يالله ..كما أذقني طعم أبغض الحلال ..فإنك قاااااادر على أن تعطيني بالحلال ..زوجا عفيفا كريما ..صاااااااااالحا
اللهم اجرني في مصيبتي واخلف لي خيرا منها
اللهم ارزقني خيرا منه زكاة وأقرب رحما ..

ماذكرت قصتي الا لاذكركم واذكر نفسي ان الله رحييييييييم بعباده .وان يختار الخير لعباده ..وذكرتها في هذا الوقت بالذات لانال منكم على دعواتي لنفسي كلمة قد تفتح لها أبواب السماء ,..فيستجاب لي ..ولكم ..
كلمة ( ( ( ( (ااااااااااااامين ) ) ) ) ) ) )..
فإنكم لاتدرون ..ان خرجت هذه الكلمة من قلوبكم وألسنتكم ..فقد تكون من حيث لا تعلمون ..سببا في سعادة انسان ..
فلا تحرموني دعواتكم المباركة في هذه الايام المباركة ...اسأل الله لكم جميعا فرجا ..ومخرجا ..ويسرا ..وانشراح صدر ..وصياما مقبولا ودعوات مستجابه ..
والحمد لله رب العالمين ..

**اسماء** عضو تاريخ التسجيل : 30/12/2010

سبحان الله

أسالك ربي أن ترزقني زوجا صالحا خيرا ممن أستحق وآمل وأن أكون قرة عينه وقلبه ويكون قرة عيني وقلبي بحولك وقوتك وعزتك وقدرتك ولكل المسلمات

بارك الله فيك اخي على هذه المشاركة الرائعة

**prince07** تاريخ التسجيل : 18/01/2011

اللهم استر بناات المسلمين بازواج صالحين واغنهم بحلالك عن حرامك يارب العالمين اللهم يسر عليهم كل عسير فانهن لا يجدن سوااك انك انت القوي العزيز اللهم انك تعلم الحق حقا فارزقهم اتباعه وتعلم الباطل باطل فارزقهم اجتنابه .... يارب العالمين .. اللهم امين

قال تعالى في سورة النور

{الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ

وَالطَّيِّبُونَ لِلطَّيِّبَاتِ أُوْلَئِكَ مُبَرَّؤُونَ مِمَّا يَقُولُونَ لَهُم مَّغْفِرَةٌ وَرِزْقٌ كَرِيمٌ}
(26) سورة النــور

استحيت من ربي قصة فتاة

استحيت من ربي قصة فتاة

رد: استحيت من ربي قصة فتاة

رد: استحيت من ربي قصة فتاة